A publicitada como “unha feira verde para todos” estase a revelar como “unha feira verde para todos aqueles que non chamen a atención sobor da escandalosa crise que está a sufrir o sector leiteiro e a vergoñenta e neglixente actitude da Xunta da Galiza e do Ministerio”.

Tras o silenzamento informativo imposto no día de onte ao respeito da presenza de gandeiras e gandeiros do sector leiteiro na Feira Internacional Semana Verde de Galiza, onde ao longo destes días está previsto o reparto de folletos informativos das reivindicacións que se visibilizarán o vindeiro mércores 17 de xuño na tractorada ás cidades convocada polo SLG, na mañá de hoxe o persoal responsábel do evento impedíu  o reparto de información no recinto e diante da porta, á Secretaria de Organización  do SLG e responsábel dos Sectores Gandeiros a nivel europeo na Coordenadora da Vía Campesina,  Lídia Senra Rodríguez.

Dende o Sindicato Labrego Galego amosamos a nosa máis fonda indignación polo ataque á liberdade de expresión do sector feita efectiva na mañá de hoxe.

Eliminadas arestora as alusións á tractorada nos medios  de comunicación públicos, encetada a volta aos criterios xornalísticos do Partido Popular coa supresión inicial dun documental sobre as vacas tolas, a censura informativa adquiríu nesta mañá  a máis dramática das metodoloxías: o silenzamento das fontes directas, as gandeiras e gandeiros da Galiza.

É este o “compromiso  co sector” do que  alardea a Xunta da Galiza?